ភ្នំពេញ៖ ប្រតិភូអូឡាំពិករបស់កម្ពុជា បានរៀបចំធ្វើដំណើរចាកចេញពីប្រទេសកម្ពុជា ទៅកាន់ប្រទេសជប៉ុនហើយនៅព្រឹកនេះ ដើម្បីចូលរួមប្រកួតក្នុងព្រឹត្តិការណ៍អូឡាំពិក ទីក្រុងតូក្យូ ឆ្នាំ២០២០ ដែលនឹងចាប់ផ្តើមនៅថ្ងៃទី ២៣ ខែកក្កដា ឆ្នាំ២០២១ ខាងមុខនេះ។

ប្រតិភូអូឡាំពិកកម្ពុជា ដែលធ្វើដំណើរទៅកាន់ប្រទេសជប៉ុននៅពេលនេះ ដឹកនាំដោយ លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា ជានាយបេសកកម្ម, លោក ញ៉ាន សុខវិសាល នាយរងបេសកកម្ម, លោកស្រីវេជ្ជបណ្ឌិត ហួត ចាន់ធានី រួមជាមួយគ្រូបង្វឹក ២រូប និងកីឡាករ-កីឡាការិនី ៣រូប រួមមានកីឡាហែលទឹក ២រូប គឺកីឡាករ ហែម ប៉ុច និងកីឡាការិនី ឃឿន ប៊ុនពេជ្រមរកត ដែលត្រូវប្រកួតវិញ្ញាសាហែល ៥០ម៉ែត្រសេរីដូចគ្នា និងកីឡាករអត្តពលកម្មម្នាក់ គឺកីឡាករ ប៉ែន សុគង់ ត្រូវប្រកួតលើវិញ្ញាសារត់ល្បឿនចម្ងាយ ១០០ម៉ែត្រ ។

មុននឹងចាកចេញពីកម្ពុជានៅថ្ងៃនេះ លោក ថោង ខុន ដែលជារដ្ឋមន្រ្តីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា ក៏បានជួបសំណេះសំណាល ផ្តាំផ្ញើ និងលើកទឹកចិត្តដល់ក្រុមប្រតិភូកីឡាអូឡាំពិកកម្ពុជាផងដែរនៅថ្ងៃចន្ទម្សិលមិញនេះ ដោយលោកបានមានប្រសាសន៍លើកទឹកចិត្តយ៉ាងកក់ក្តៅបំផុត ដោយក្រុមកីឡាករ កីឡាការិនី គ្រូបង្វឹក ត្រូវខិតខំប្រឹងប្រែងឲ្យអស់ពីលទ្ធភាព ដើម្បីការប្រកួតតំណាងឲ្យជាតិ នាពេលនេះទទួលបានជោគជ័យ។ យើងដឹងហើយថា យើងទៅពេលនេះ គឺយើងទៅក្នុងនាមជាសមាជិកនៃគណៈកម្មការជាតិអូឡាំពិកនៃគណៈកម្មការអូឡាំពិកអន្តរជាតិ ដែលមានកាតព្វកិច្ចជាប្រទេសសមាជិកមួយ ត្រូវតែបញ្ជូនកីឡាករទៅចូលរួមប្រកួត និងបញ្ជូនតំណាងរបស់ខ្លួនចូលរួម។ ការប្រកួតអូឡាំពិក រៀងរាល់៤ឆ្នាំម្តងនេះ គឺសមាជិកត្រូវតែមានវត្តមាន នៅក្នុងពេលប្រកួតអូឡាំពិកនេះ។

នៅក្នុងពិធីជួបសំណេះសំណាល ជូនដំណើរ និងលើកទឹកចិត្តពីសំណាក់ឯកឧត្តមបណ្ឌិត ថោង ខុន រដ្ឋមន្ដ្រីក្រសួងទេសចរណ៍ និងជាប្រធាន NOCC ម្សិលមិញ ឯកឧត្តមរដ្ឋមន្ដ្រីក៏បានឧបត្ថម្ភថវិកាដល់ប្រតិភូ និងអត្តពលិកកម្ពុជា ក្នុងម្នាក់ៗ ៦០០ដុល្លារ ។ ចំណែកក្រសួងអប់រំ យុវជន និងកីឡា តាមរយៈឯកឧត្តម អ៊ុក សិទ្ធិជាតិ អគ្គនាយកកីឡា ដែលបានឧបត្ថម្ភលើថ្លៃសំបុត្រយន្តហោះ និងការដោះស្រាយលើប្រាក់ហោប៉ៅ ដែលជាការលើកទឹកចិត្ត និងផ្តល់នូវភាពកក់ក្តៅបន្ថែមទៀត ដល់ក្រុមប្រតិភូ អត្តពលិកកម្ពុជា ដែលត្រូវចូលរួមព្រឹត្តិការណ៍ពិភពលោកនេះផងដែរ ៕




រូបភាព៖ CAMBODIA SEA GAME 2023